هام لطلاب الثانوية العامة "

مقال قرأته عن د احمد عبد الباسط واعجبني فنقلته كما هو

بواقع خبرة 14 عام في مجال التدريس الجامعي وقبل الجامعي ( 9 سنوات كمحاضر للفيزياء في جامعة القاهرة / و عام كمحاضر للفيزياء في جامعة قطر / 4 سنوات في تدريس الفيزياء بالولايات المتحدة الأمريكية ) وخبرة في العمل والتدريس في ثلاث قارات ( آسيا / أفريقيا / أمريكا الشمالية ) حابب أعطي نصيحة من القلب لطلاب الثانوية العامة المقبلين علي التقديم للجامعات في مصر وكل الدول العربية

مفيش حاجة في أمريكا والدول المتقدمة أسمها كليات قمة وكليات قاع .. كل مكان هتقدر تتفوق فيه هو كلية قمة بالنسبة لك ... ممكن واحد يدخل طب ويعدي فيها بصعوبة ويطلع دكتور مثله مثله ملايين الدكاتره في البلد وممكن واحد يدخل كلية أخري تجارة / حقوق / آداب ويتفوق فيها جدا ويكون علامة في مجاله ويشار له بالبنان بعد ذلك ولنا أمثلة كثيرة في ذلك.

مجال البرمجيات وهندسة الكمبيوتر ونظم المعلومات هو المستقبل بدون شك .. مرتب مهندس البرمجيات وما يشابهة في مجال التعامل مع الشبكات و أمن المعلومات في أمريكا من أعلي المرتبات علي الإطلاق .. ولك أن تعلم أن أغلبية فيزا العمل التي تمنحها أمريكا لغير الأمريكيين ( ومن بعدها الجنسية ) تكون للعاملين في مجال البرمجة وأمن المعلومات .

تخصصات البرمجة وأمن المعلومات وتطوير الشبكات دي ممكن تدرسها مع تخصصك بمعني إنك لو لم توفق في دخول كليات ( هندسة ( حاسبات )/ حاسبات ومعلومات / علوم ( حاسب ) ) ودخلت أي كلية أخري ممكن خلال سنوات دراستك بالكلية تحصل علي أكبر قدر من الكورسات والشهادات المعتمدة في مجالات البرمجة ونظم المعلومات .. ده هيفيدك جداً لما تتخرج بأي شهادة وكمان ممكن تشتغل به مباشرة .

اللغة ... أبوس علي رأسكم أهتموا باللغة .. الإنجليزية لازم تتقنها كتابة وقراءة ونطقاً ... طوروا نفسكم في اللغة ... إنتم عندكم فرص ذهبية ووقت طويل في الجامعة تظبطوا فيها اللغة بتاعتكم ...وخاصة خريجي مدارس الحكومة اللي بيتعلموا فيها نطق الإنجلش بطريقة " إيمي سمير في فيلم عسل أسود " ، مفيش حد هيلاقي شغل محترم سواء في مصر / الخليج / أورويا و أمريكا ..واللغة بتاعته وحشة إلا لو كان عبقري عصره وزمانه ... فاستغلوا سنوات الكلية في تطوير اللغة عن طريق الكورسات المتاحة مجاناً أون لاين ( اللي محتاج مساعدة في ده أنا ممكن أساعده ) .

أوعي تضيع ال 4 سنوات بتوع الكلية ( ال 5 لو هندسة/ صيدلة / أسنان و ال 7 لو طب ) في تحصيل المادة العلمية للتخصص بتاعك فقط ... حاول تستغل الوقت في أكتساب مهارات ومعرفة جديدة ... مش عايزه دكاترة ومهندسين ومحاسبين يتخرجوا وهم غير ملمين بباقي العلوم ولو من باب القدر القليل من المعرفة وكما ذكرت سابقاً ( اللغة ومجالات البرمجة أهمهما )

في مجال هيخرب العالم حديثاً ( شخصياً بحاول أدرسه وأخد فيه ماجستير أو دكتوراة تاني ) وهو ال Quantum Computing وشرحه بكل بساطة كالتالي ( تتمتع الحواسيب الكمومية بقدرة كامنة على إجراء حسابات محددة وبسرعة أكبر بكثير من سرعة أي حاسوب ذو أساس سيليكوني (silicon-based computer). في الواقع، بنى العلماء حواسيب كمومية أساسية يُمكنها إجراء حسابات معينة، لكن لايزال الوصول إلى الحواسيب الكمومية العملية أمراً بحاجة إلى الكثير من سنوات العمل وهو المستقبل في مجال تكنولوجيا المعلومات )، ده ممكن تكمل دراستك فيه لو إنت حاصل علي(حاسبات ومعلومات / هندسة كهربية أو إلكترونيات / علوم فيزياء وخاصة فيزياء الكم " كوانتم ")

أولياء الأمور ، من فضلكم لما أبنك ولا بنتك في الجامعة ييجي يقولك عايز أخد كورس إنجليزي ولا برمجة ولا تصوير ولا إخراج بلاش تفتكروا الضغط والسكر وكل الأمراض وزنقة المصاريف وتعملوا شغل " عبلة كامل " في دور خالتي فرنسا لما الليمبي طلب منها فلوس ، صدقوني الشباب بالكورسات دي هتنفعكم بعد ما تطلعوا معاش وهتصرف عليكم كويس متخفوش مفيش حاجة بتضيع

طبعا إنت لو عندك واسطة كويسة هتسيبك من كل الهري ده وتدخل جيش أو شرطة أو حقوق ( للإلتحاق بالنيابة لاحقا ) وهتحط رجل علي رجل وتبص للناس اللي فوق دي بنظره إيه العالم اللي مضيعه حياتها في اللوغارتمات الغريبة دي ، فالبوست ده ياباشا مش لسعادتك

ياريت اللي عنده حد في الثانوية عامة يمنشنه أو يشير له البوست وينصحه ياخد بالكلام وخاصة في الوقت الذهبي ده من عمره قبل يكبر ويعجز زينا ويدخل الثلاثينات والأربعينات ويبقي نفسه يدرس ومش عارف ولا قادر ولا عنده الوقت لذلك .

تحياتي وتقدير

أحمد عبد الباسط

محاضر الفيزياء / الولايات المتحدة الامريكية

تعديل : ده لينك صفحة د/ احمد عبد الباسط لمن اراد التواصل معه بخصوص الانجلش او غيره

https://www.facebook.com/ahmed.a.mohammed.102?__cft__[0]=AZXyGN1lGC0Nqg2I4lYrf5aWOeIuimQ2XOuCy0uQM60tat3L-ucQnPiRwp1en_nmYJeHva66Jn-r98PK_YdQ6oth-07e7xGhm1tVgZWpr-2DgKFFoy_Gg_A9iYP2qgaMrhlGYK-Ym9l8-r1VbLIO2ioM&__tn__=-]K-y-R

تصنيف : من أجمل ما قرأت